المخيم عاش فينا

اشتقت لسندويشات حسن الطريفي وهرايس ابوهنية وعوامة جمال حنفية 

اشتقت لفلافل ابو حافظ وخبز شعبان وفول صالح 

دخاني من الفر اشتريتو

 وحلبي الشملتي مانسيتو

 قعدة الصبح عالسنبل وبعد الظهر سندويشات العائدين 

الجمعة حمص وصحن عجة عند ابو طلال عقهوة ابو جعفر بنتفرج قاعدين

ورسايل الاحباب عصندوق البريد ابو اكرم طهرني والبواب عالجني ودواي بصيدلية يارد لقيتو

 عصير سلاش من محمص العوده وحلاوة النبي موسى من عند أبو رشيد وفلافل محشي عند السنيورة  وخبز طابون البسيوني فصلت ميدالية فلسطين عند حبيبي فواز النورس الله يرحمو واشتريت القهوة من محمص فلسطين 

دفاتري وأقلامي من النابلسي وزهران  وفي مدرستنا ابو بشار كنا شاطرين وفالحين 

ومن مكتبة شعبان شريت ورق ملون للطبق وطيرتو عالسطح بالوان علم فلسطين

عالسحاسيل ركبنا والكرعش طردنا عشان عبينا حالنا طين

وفتة الحمص عند التوتنجي كعك بسمسم عند فرن الحج ابو محمد ياغي والغريّبِه عند برجوس

 وتصورت عند الخيام ووقية كنافة من حبيبه وبدلة الرياضة من بركة 

حلقت شعري عند ابو الزق وكويت القميص عند ستيم والبنطلون ظل عند صيدم والجاكيت عند زمزم 

وغازي كان فاظي وعبيتو من ابو سليم

 روحت مع ستي من المؤن واشتهيت في العيد مرجيحة أبو الأمين 

صليت  الفجرعند الحج محمد والشيخ يوسف في الكبير والظهر عالجنوبي والعصر في المدارس والمغرب ع ابو نشيش والعشا في العائدين !!!

...مخيم الوحدات 

مازال يذكرني بفلسطين...